ثمن الغربة في البداية لازم أقول إن صاحب الفضل الحقيقي في كتابة هذه المقالة هو أغلى وأعز إنسان في حياتي…
الشخص اللي خلّاني أشوف الحقيقة من غير تجميل…
وخلّاني أحس إن الغربة مش مجرد كلمة بتتقال…
الغربة وجع بيتحس.
الغربة مش بس سفر…
الغربة ثمن بيتدفع كل يوم، من غير ما حد يشوفه.
مش تذكرة طيران وختم على الباسبور…
دي فاتورة مفتوحة طول العمر.
بتدفعها لما تضحك لوحدك…
لما تفرح ومفيش حد يحضنك بجد…
لما تتعب وتلاقي نفسك بتسند على الحيطة… مش على إنسان.
ثمن الغربة مش فلوس…
ثمنها لحظات بتضيع منك ومش بترجع.
بتفوت أول فرحة… أول نجاح…
وأول دمعة لحد بتحبه.
بتفوت تفاصيل صغيرة…
كانت ممكن تصنع منك إنسان أسعد…
بس أنت اخترت تكون بعيد.
بيقولوا: “سافر علشان تبني مستقبلك”…
بس محدش قالك إنك ممكن تبني المستقبل… وتخسر نفسك في الطريق.
بتكبر فجأة…
مش علشان نضجت…
لكن علشان اتعلمت إن مفيش حد هييجي ينقذك.
الغربة بتكسر حاجة جواك…
حاجة اسمها الأمان.
أسوأ حاجة في الغربة…
إنها بتخليك غريب حتى لما ترجع.
ترجع بلدك… بس مش نفس الشخص.
وترجع لناس بتحبهم… بس مش عارف تحكي لهم إيه اللي حصل جواك.
تحس إنك بقيت لا هنا ولا هناك…
نصك ضايع… ونصك تايه.
ووسط كل ده…
في ناس شايفينك ناجح…
شايفين الفلوس… شايفين الصور…
بس محدش شايف الوحدة…
ولا صوتك وانت بتقول: “أنا تعبت”… ومفيش حد سامعك.
ثمن الغربة مش بيتحسب بالبنوك…
بيتحسب بعدد الليالي اللي نمت فيها مكسور…
بعدد المرات اللي ضحكت فيها وانت موجوع…
بعدد الحاجات اللي خسرتها… ومحدش حس بيك.
وفي الآخر…
السؤال الحقيقي مش: “كسبت كام؟”
السؤال: “خسرت إيه علشان تكسب؟”
لأن الحقيقة المؤلمة…
إن في ناس رجعت من الغربة ومعاها فلوس…
بس سابت عمرها هناك… ومقدرتش ترجّعه.
الغربة مش حرام…
بس اللي حرام بجد… إنك تدفع عمرك كله تمن لحلم…
وفي الآخر تكتشف إنه ماكانش يستاهل.
دي مش مقالة… دي صرخة.
صرخة من قلب كل واحد سافر وهو فاكر إنه رايح يعيش…
فاكتشف إنه رايح يدفع…
ثمن الغربة.
بقلم: ملك السيد السيسي
لا توجد تعليقات بعد.