أحمد السقا يرد على واقعة انتقاده من الجمهور بعد بثه لفيديو دعم لمحمد صلاح.
كتبت: إيمان عبدالرازق
في مداخلة تليفونية أجراها الاعلامي عمرو أديب هلال برنامجه الحكاية مع الفنان النجم أحمد السقا قال فيها :
– معايا الميجا ستار أحمد السقا ازيك يا أحمد
ليرد أحمد السقا: بلاش ميجا ستار يا أستاذ عمرو جابتلي الكافية
– أيه الحكاية يا أحمد؟
– الحكاية إني رايح فرح بنت محمد هنيدي فـكنت بقلب في التليفون لقيت محمد صلاح متأثر وبيدمع فـصعب
عليا جدًا
ولقيت كلام كتير والرياضة دخلت في الدين والسياسة فـبم إني بتاخدني الجلالة وعز الدين أيبك جوايا بيطلع عملت فيديو بالعربي بدعم فيه محمد صلاح وبحمسه ، وبعد كدة قولت أوجه رسالة بالانجليزي أكيد هتوصل بأي حد مهتم بينا من الجرايد لأن
الناس دي ليهم بروتوكول فلو قولتلهم أنا ممثل بس فهتصنف إني ممثل مسرح
فـإستخدمت أعلى مصطلح علشان يوصلهم إن اللي بيتكلم ده على قدر من العلم والثقافة
وبفهمهم إن انتو بتتصرفوا مع واحد من بلدنا تصرف هيخسر ليفربول جمهور كتير
بشكل أو بآخر ممكن تكون خانتني الألفاظ في التعبير بالانجليزي ، وقولت إن صلاح كوتش
بنية إنه في الملعب أحيانا بيوجه اللاعيبة للخطة اللي حطها المدير الفني،
عملت الفيديو بمنتهى حسن النية وربنا مطلع على القلوب
الفيديو اللي بالانجليزي عمل ريتش أنا مش متخيله بعدها فتحت
لقيت الفيديوهات اتمسحت ومش أنا اللي مسحته ، أنا
مش بعمل حاجة وبرجع فيها
أنا بجد محبط طول النهار من سلوكنا كمصريين
ليرد عمرو أديب: ليه إيه اللي حصل احكيلي يا أحمد؟
= أنا مش مختل علشان أخاطب صراحة ادارة ليفربول ، لكن قولت لعل وعسى يكون فيه حد مصري انجليزي عايش هناك
يقدر يوصل الرسالة والدعم لابننا محمد صلاح ، لكن فوجئت في كومنتات كل الصفحات إني اتهـنت اتهننننت أنا وأسرتي وأبويا وأمي وأولادي
تقولي اعمل محضر؟ هعمل في مين ولا مين؟ بالإضافة إلى إن مبدأي لو حصل أيه والله ما أقدر أأدْي حد
فأنا بس مستغرب هل احنا كشعب مصري حنين طيب اللي كان بيطبطب وبياخد بإيد أي حد متضايق بقى
خصيمنا بهذا الشكل لدرجة إن لو حد دعمني وقال كلمة حلوة في حقي بحسن نية بيلاقي وابل من الشتايم يعف لساني إني أقولها ولا يصح إني أقولها على الهوا ..احنا كنا أحن وأطيب من كدة معرفش ايه اللي حصل
اللي يقولي انت خلاص قاعد من غير شغل ، أنا مش ملاحق والله وصورة محمود المليجي اللي بيسألوا عليها ..أنا اشتريت الصورة دي في مزاد أيام الكورونا
وكان ليها ذكرى معايا دي كل الحكاية
احنا يا جماعة محتاجين إعادة تأهيل سلوك بينا وبين بعض ، محتاجين نطبطب على بعض
نلتمس العذر لبعض ، المشكلة إن الناس مش واخدة بالها إن احنا مننا فينا بنقطع في بعض
انا صعبت عليا نفسي يا أستاذ عمرو .. 5 ساعات حضرتك بالبلدي اتنشر عرضي
فيرد عمرو أديب: لا إله إلا الله
واستكمل السقا: أنا حزين .. اللي يقولي انت مابتعرفش تمثل والألفاظ كلها يعاقب عليها القانون لأن اقل لفظ فيها ماقدرش أقوله على الهوا
الراجل اللي انتو أهـنتوه وأهـنتوا أولاده وأهنتوا أبويا الله يرحمه هو الراجل اللي انتو صنعتوه
واللي عملكم أفلام اتبسطوا بيها وشكرتوه عليها في يوم من الأيام
أنا بطلب من الناس اللي على السوشيال ميديا اللي عملوني في يوم من الأيام
لو مش عايزيني الله يكرمكم اكتبولي مش عايزينك وقسمًا بالله ما هتشوفوا وشي ولا هتسمعوا صوتي تاني
أنا كان كل غرضي إني شايف واحد مستضعف وفي غربة وواجهة مشرفة للعالم العربي أديله بريق أمل
وأقف جمبه
فكانت نيتي خير
أنا عملت log out من صفحات السوشيال ميديا ولو أقدر أعمل log out من حياتي هعمل كدة .. أنا مش هعمل حاجة لأي حد أهانني بس بطلب منه يغمض عينه ويتخيل شكلي وشكل أمي اللي كلمتني قبل البرنامج وهي حزينة جدًا أنا خصيمهم كلهم يوم القيامة .
