الطبيب العالمي دكتور أسامة شوقي يكتب قصة مثيرة للفضول

728x90

728x90

عاده اكتفي في الصباح بالقهوه و ربما قطعه فاكهه واحده..
و لكن ذات يوم استيقظت جائعا و نفسي مفتوحه عايز افطر زي كل الناس بقي..
تسللت خلسه مع تباشير الصباح ..

اسير علي اطراف اصابعي الي الثلاجه و كأني اخطط لارتكاب سرقه خفيه..

فتحت مصراعي الثلاجه بهدوء و طفقت اقلب عيني بين الادراج العليا و السفلي ابحث عن ما لذ و طاب و احلم بتجهيز طبق بنديكت ايج بالسومون او سبانيش اومليت بالفلفل الاخضر و الطماطم..
او اعمل لي شندوتش جبنه جرويير او بوكورينو رومانو او ابينزيللر في عيش باجيت محرمش مع شرائح خيار و طماطم..و الجبنه السايحه تبظ من ع الجوانب ..

المهم..
بينما اقلب عيوني محتارا ماذا اختار، وقع بصري علي علبه بلاستيك كبيره الحجم تستقر في الدرج الاسفل للثلاجه و لم الاحظها سابقا🤔
التقطها بيدي و رفعتها للاعلي استكشف ما بداخلها..

فتحت غطاء العلبه لتنطلق منها رائحه قويه نفاذه تخترق نخاشيش الدماغ..

و رغم انني لم اجرب البانجو و لا الحشيش و لكن تلك الرائحه ( تلك الرائحه علي رأي استاذنا صنع الله ابراهيم) لها تأثير يخطف اللب و يزغزغ الاحساس بشده..

نحيت الغطاء بحرص..نظرت الي داخل محتوي العلبه لأجد قطع صلبه مستطيله مغطاه بسائل داكن لزج لا ادري كنهته و لا استطيع التعرف عليه..

شككت ان يكون محمود القائم علي المنزل يكون يعبث من خلف ظهرنا و يقوم بتخزين طرب مخدرات او ممنوعات في بيتنا
( علي غرار الدقماش بتاع فيلم العار اللي كان بيخزن صفايح المخدرات في الملاحات)
استدعيت فورا محمود علي وجه السرعه لاستفهم منه..
اتي محمود مهرولا متعجبا حيث لم يتعود يجد البيه بيفتش في الثلاجه في المطبخ..

و بدأت الاستجواب لمحمود بجديه و حده ؛
س: ما قولك في تلك الاشياء في العلبه المجهوله الهويه التي تستقر في قعر الثلاجه؟
يرتجف محمود خوفا من عقاب ما
ج: يا باشا حضرتك اللي جبتهم بنفسك و سلمتهم ليا

س: بلاش كذب يا محمود و لا تحاول الانكار.. انا مجبتش العلبه دي و لا اعرفها
ج: يا باشا دي كانت من ٧ شهور لما حضرتك كنت راجع م المنصوره و الدكاتره بتوع هناك ادوك شنط هدايا و كان فيها فيها فطير مشلتت و بط و جبنه قريش و العلبه دي كانت معاهم .. بس انا رصيتها في علبه بلاستيك من عندنا

س : و ما قولك في طبيعه هذه المكونات الغريبه ذات اللون الطيني الغير معلومه الاصل؟
ج: يا باشا دي معلومه الاصل و ليها اصل و فصل كمان..ده جبنه فلاحي قديمه اسمها المش البلدي المعتبر

س: و لماذا لم تبلغني سابقا عن وجوده بالثلاجه
ج: حضرتك مطلبتهوش قبل كده و الدكتوره قالت لي خليه في الثلاجه لما نشوف يمكن نهاديه لحد

س: يعني المش ده باظ دلوقتي بعد ٧ شهور تخزين
ج: يا باشا ده كل ما يقعد يحلو اكتر.. دا امي حدانا في البلد بتخزن المش في الزلعه سنين و سنين🥺

س: يعني فكرك ممكن ادوق منه دلوقتي?
انفرجت اسارير محمود عن ابتسامه عريضه
ج: اتفضل انت استريح يا باشا و ح اعمل لك طبق تحلف به

رجعت بالذاكره منذ ٧ اشهر حينما دعاني زملائي د محمد حسني و احمد عاصم الملا و نسق الزياره د عاشور.. و ذلك لاجراء يوم علمي و جراحات في مركز رويال في ميت بدر خميس بالمنصوره😍..
و تعرفت علي مجموعه رائعه من الزملاء..
منهم طبيب شاب جميل جدا اسمه احمد عادل👍..
في نهايه اليوم بينما اتأهب لاستقل السياره لمغادره المنصوره ، لقيت احمد عادل نازل جري و هو بملابس العمليات عشان يسلم عليا و يودعني 🙏
و صمم يعطيني علبه هديه و قال لي لازم تدوق ده و حتدعي لي يا دكتور اسامه..
عدت للقاهره و نسيت الموضوع و نسيت امر تلك العلبه الخفيه ..
و قامت الهانم حرمنا بفرز شنط الهدايا و تحديد كنهه محتوي كل شنطه و ترتيبها و توزيعها في الثلاجه..
و استلم محمود شنط هدايا المنصوره و قام بتخزينها حسب اوامر الهانم حرمنا المصون..

نعود بقي لاحداث اعداد طبق المش الرهيب🤩
شعرت بالقلق ان اترك محمود لوحده في المطبخ كي يحضر هذا المش اذ ربما به مواد ضاره و لا اضمن نقاء و سلامه المحتوي🥺

وقفت اشاهد محمود يقتطع بحرص هبره من كتله المش..
انكشف تحت السطح اللزج من كتله المش الداكنه القلب الداخلي ذو لون قمحي ابيض يميل للسمار ..
و تساقطت فرافيت علي الجوانب😋..

قام محمود بنقل القطعه المربعه الي طبق اخر و طفق يهرسها ببطئ بالشوكه..
بعد ان فرد فرافيت كتله المش في طبق غويط قام بسكب زيت زيتون بكر ..
سال زيت الزيتون بلونه الاخضر علي سطح المش الداكن بلون طمي النيل ليرسم لوحه سيرياليه اقوي من ابداع بيكاسو😋..

وقفت مشدوها اشاهد تلك المراسم بينما الرائحه الذكيه تتسلل الي نخاشيشي بقوه..
التفت محمود الي الثلاجه و التقط حبات طماطم قانيه طازجه و قام بتقطيعها مكعبات صغيره..

🍅 🍅
ثم قام بنثر الطماطم لتتناثر علي سطح المش بلونها الاحمر القاني يشع احساس طازج و تضيف لمحه جمال و سحر لتلك اللوحه البديعه😋😋..

ثم التقط محمود حزمه جرحير اخضر يانع ورور و هذبها و ازال السيقان ثم رصها علي جانب الطبق..

نظرت بذهول شديد امام هذا التكوين البديع من الالوان و الرائحه الذكيه لمزيج المش بزيت الزيتون..

لم اقوي علي الانتظار و فتحت صندوق المخبوزات التقط قطعه كرواسان الاتيه صباحا فريش من عند بول..

سارع محمود بمنعي قائلا؛
– دا مينفعش يا باشا مع طبق المش.. انا عندي عيش في اوضتي جايبه معايا م البلد .. ح اسخن لحضرتك رغيف حالا..
لم اقوي صبرا و اتجهت لماكينه الاسبريسو اجهز واحد ماكياتو دارك كوفي فقاطعني محمود؛
– يا باشا ده مينفعش مع المش😂 سيبني انا اعمل لحضرتك كوبايه شاي و جربها مع المش و حتدعي لي..
نحي محمود علبه شاي ايرل جراي جانبا و احضر من حجرته علبه شاي العروسه فرط و قام بغلي الشاي في ابريق شاي لونه ازرق من عنده و لم يستعمل كيتل سخان الماء الكهربائي..

بعد ان اعد محمود الفطار ، قام ب رص الاطباق بعنايه علي الترابيزه في الحديقه..
جلست متلهفا و حولي مشهد الصباح البديع بينما زقزقه عصافير تصدح بأجمل سيمفونيه..

بسم الله الرحمن الرحيم..
التقط بيدي الرغيف الساخن .. اقتطعت كسره كبيره..و كورت اللقمه و نزلت بها انقضاضا علي طبق المش يماثل انقضاض طائره سبيتفاير الانجليزيه و هي تنفض علي الهدف الارضي 😂
لتغترف هبره محترمه من مزيج المش المهروس بزيت الزيتون و الطماطم
القيت اللقمه الي فمي بينما اميل برأسي للخلف خشيه ان تتناثر فرافيت علي صدري..
لقمه العيش البلدي السخن تلتف تحتضن مزيج المش الطري في سيمفونيه عشق لا تنتهي..ثم التقطها بشفتي و يسيل الزيت علي جانب فمي..
امضغها في عشق و اتلذذ بها ببطئ..

و هنا كما قال عبد الوهاب؛
و تعطلت لغه الكلام..
و مفيش عبارات و لا الفاظ ممكن توصف الشعور و لا الاحساس..

فعندما تتسع لذه الاحساس تضيق الكلمات علي وصفها..
توالت لقمه بعد لقمه مع اضافه شذرات الجرحير الورور و شفطات من الشاي الثقيل..

توقف الزمن و غابت كل مشاغل الحياه و اقتصرت فقط علي صحبه طبق المش بالعيش البلدي الملهلب و كوب الشاي الساخن..