النجم محمد رمضان: أنا اتولدت لقيت كل حاجة حواليا.

728x90

728x90

كتابة وتقرير: إيمان عبدالرازق

أحل النجم محمد رضان ضيفاً على برنامج abtalks والذي يقدمه أنس بوخش ويذاع على اليوتيوب وأهم ما قاله رمضان حين سأله أنس أولا من هو محمد في كلمة؟ فأجاب: فنان .

وعن أصعب كلمه اتقالتله لما جه يمثل : اجاب ” سيب التمثيل لناسه” قال مافهمتهاش .

وأصعب لحظه مريت بيها :لحظة وفاة والدي انا لما كان بيجي مجرد فكرة في بالي ان افقد ابويا او امي ربنا يديها الصحة كنت بنهار لوحدي وكانت مجرد فكره، فلما حصل وابويا اتوفى انا لقيت نفسي عندي كمية صبر وسكينة جايز ابويا دعاها لي في سره مثلا ان ربنا ينزل عليّا الصبر والسلوان أو جايز دي هبه ونعمة ربنا ادهالي فلما لقيت أخويا الكبير بيبكي قولتله انت مبتحبش ابوك ، أبوك في مكان احسن هو مرتاح دلوقتي انا ابويا اتولد يتيم أمه ماتت وهي بتولده فهو مع أمه دلوقتي ومع أبوه ومع كل الناس الحلوه وفوق دا كله مع ربنا ربنا يارب يمتعه برؤية ربنا .. أنا مبكتش على وفاة والدي في لحظة وفاته بكيت بعدها في انفراد تام لوحدي .

وعن علاقته بربنا قال: الحاجة اللي مش ممكن احطها على السوشيال ميديا هي الأشياء الخاصة بعلاقتي بربنا

، عملت عمره كتير وعمري مانزلت صورة عند الكعبة فكرة ان عقلي يفكر أطلع الموبايل عند الكعبة مش موجودة، أنا مع الكبير خالص عايز توري مين؟! دي لحظة خاصة عايز ابقى مع العظيم اوي هعوز ايه تاني !

وبالنسبة للموت قال لما اتولدت انا مكنتش ماضي عقد لما اتولد انا عايز ألاقي ام واب ، عايز ألاقي سرير، عايز ألاقي رعاية ،عايز لما اجوع حد يأكلني، لما أعيط حد يهشكني يعني مامضتش دا ومع ذلك اتولدت جيت من المجهول للعالم الجديد دا لقيت ربنا مرتبلي كل حاجه جايبلي أب وأم ناس حواليا ناس يأكلوني فاللي مسابنيش في المرة الأولى مش هيسيبني في المرة التانية

واضاف محمد رمضان عن قيمة الوقت قائلا: أنا عرفت ليه سموا عقرب الساعه عقرب لأنه لو مسكني هيموتني فأتعودت اني اقعد أجري أجري طيب هل العقرب دا مثلا بيقف احتراما لأي حاجة بتحصل في العالم؟ يعني هل مثلا لما اتوبيس فيه اطفال اتقلب والاطفال اتوفوا هل عقرب الساعة وقف حزنا على هؤلاء الأطفال؟! اذن الوقت مبيستتاش حد والوقت ليس لديه مشاعر لا يكره ولا يحب ولايتأثر هو ماشي فأنا اتعلمت ان كل

حاجة اعملها وانا بجري افرح وانا بجري احزن وانا بجري احب وانا بجري اسمع مزيكا وانا بجري

وعن طموحه قال رمضان : انا اتولدت شايف الهرم فكان طموحي كولد صغير ان ألمس الأهرامات التلاته انا كان طموحي أليف وبعدها اتحول لطموح شرس لما تلاقي نفسك بتنجح واعمالك بتعلم وتأثر مع الناس في الشارع انت مفيش حد بيأثر مع الناس زيك فبتبقى عاوز نجاح أكبر وبعد شوية أخدت risk وقولت لأ انا عاوز أغني كمان وده كان مخاطرة وطموح أكبر والحمد لله نجحت .

اما عن سؤاله بماذا تعني له مصر أجاب: مصر هي بالطبع كل شئ هي التي شكلتني هي أمي .

ولما سأله هل نمبر وان حقيقة ولا مجرد شعار ؟ أجاب: حقيقة أكيدة وبدلائل كثيرة جداً

ولو علمت كل طفل درس واحد فقط فماذا هو أجاب: “الثقة في الله نجاح”

واجمل ماقاله محمد رمضان عن الدنيا: استشهد بالآية القرآنية “وماالحياة الدنيا الا لعب ولهو” فقال: ان أي

لعبة ليها قانون كرة القدم ليها قانون ،الملاكمة ليها قانون، حتى الأستغماية اللي كنا بنلعبها واحنا صغيرين ليها قانون ان مينفعش تفتح عينيك اذن مفيش لعبة ملهاش قانون ؛ فالدنيا لعبه أنا بحس إنها لعبة وليها قانون والدليل على دا البيت اللي أنا بشتريه مبخدهوش معايا بعد مابطلع من اللعبه لأني اشتريته جوه اللعبة، اشتريت لبس جوه اللعبه قابلت واحده وارتاحتلها وحبيتها فأتجوزتها جوه اللعبه، خلفنا عيال جوه اللعبه ،وفي الآخر بسيب اللعبة دي بمجرد ما مُدتي خلصت وبروح للحقيقة بقي كأنك كنت focus على التي في على التليفزيون وانت بتلعب فالنور قطع ففصلت اللعبة وبصيت حواليك وتلف كده فتكتشف هو أنا كنت سايب دا كله وقاعد ماسك ومركز في اللعبة الصغيرة أوي دي ، لا دا فيه حاجه أكبر بكتير .

ولاقت الحلقة استحساناً كبيراً من جمهور محمد رمضان ورواد السوشيال ميديا وتداولوا مقاطع منها معلقين على حبهم لكلامه ومدى ثقافته ووعيه ونظرته الثاقبة في الحياة .